Formula-1-in yeni rəhbəri: Berni Ekklstoun qısa müddətli planlar qurub inkişafı ləngidirdi

Formula-1 yarışının yeni rəhbəri Çeyz Keri sələfi Berni Ekklstoun barədə mənfi fikir söyləyib. Allsport.az saytı xəbər verir ki, o, iş adamını bu idman növünün inkişafdan saxladığını deyib. F-1.az xatırladır ki, “Liberty Media” yanvarda formula-1-i satın aldıqdan sonra, Berni Ekklstounu rəhbər vəzifəsindən tamamilə uzaqlaşdırmış və onun əvəzinə Çeyz Keri gətirilmişdi.

“Bəli, formula-1 onun dövründə daha çox böyüyə bilərdi. Reallaşdırmaq istədiyiniz ideyalara inkar cavabı verilsəydi, necə olardı? Məyusluq əmələ gələrdi. Elə şeylər var ki, lazım olduğu halda reallaşmayıb. Bu idman son 5-6 ildə bütün potensialından istifadə edə bilməyib.

Hamımız səhv edirik və heç kim mükəmməl deyil. Berni neçə illərdir bir işi görürdü və məhsulunu 8 milyard dollara satdı. Etdikləri tərifəlayiqdir, amma müasir dövrdə idman üçün bazar lazımdır. Formula-1 isə yaxşı satılmırdı.

Üç aydır ki, idman bizim əlimizdədir və qısa müddətli planlar qurmaq idman üçün yaxşı olmayıb. Biz artıq növbəti 3 ilin planlarını qururuq. Berni isə həmişə qısamüddətli planlar qururdu. Bəzi qərarları vermək üçün yaxşı düşünmək lazım idi. Məsələn, hazırkı mühərriklər çox qarışıq, çox bahalı və idmanın simvolu olan səsdən uzaqdır. Bir şey edəcəyik və bu, vaxtımızı alacaq. İki ay ərzində mühərrik məlum olmayacaq, çünki qısa müddətdə buna qərar versək, faydadan çox zərər verərik”- deyə, Çeyz Keri bildirib.