İcra başçısı “Kəpəz”in futbol məktəbi ilə tanış olub

Gəncənin icra hakimiyyətinin başçısı Niyazi Bayramov şəhər stadionuna təşrif buyuraraq, futbol akademiyası ilə tanış olub. Allsport.az saytı xəbər verir ki, klubun idarə heyətinin sədri İlqar Nadiri AFFA-nın dəstəyi ilə inşa edilən akademiya ilə bağlı icra başçısına məlumat verib.

İnşaat işləri bir müddət öncə yekunlaşıb. Son mərhələdə binanın mebel təchizatı, fitnes avadanlıqları və digər inventarların yerləşdirilməsi prosesi yerinə yetiriləcək.

İki mərtəbədən və zirzəmidən ibarət olan akademiyada bəzi otaqlar simvolik olaraq “Kəpəz”in rənglərinə uyğun sarı və göy rənglənib.