“Kramarenkonun Azərbaycan millisində işləməsi SSKA üçün problem olmayacaq”

Rusiyalı baş məşqçi Valeri Qazzayev millimizin qapıçılar üzrə məşqçisi Dmitri Kramarenkonun Moskvanın SSKA klubuna keçidi barədə danışıb. Allsport.az xəbər verir ki, 66 yaşlı mütəxəssis təyinatı müsbət qiymətləndirib:

“Dmitri Kramarenkonu əla qapıçı kimi çox yaxşı tanıyıram. Onun atası Sergey Kramarenko da dahi qapıçı olub. “Neftçi”nin heyətində SSRİ çempionatının bürünc medallarını qazanıb. Həmin vaxt Bakıda mükəmməl komanda var idi. Dmitri Kramarenko ÇSKA-nın qapıçısı İqor Akinfeyevlə yaxşı tanışdır. Hesab edirəm ki, onları uğurlu fəaliyyət gözləyir. Aralarında əlaqənin olması vacibdir. Düşünürəm ki, bu birlik komandanın xeyrinə olacaq. Qonçarenko ilə işləyə biləcəkmi? Kramarenkonu kluba dəvət ediblərsə, şübhəsiz ki, burada baş məşqçinin də rəyi olub. Axı, o da komandaya yaxşı mütəxəssisin gəlişində maraqlıdır”.

Təcrübəli mütəxəssis Kramarenkonun həm Azərbaycan millisi, həm də Moskva klubunda işləməsinin mümkünlüyü barədə bunları deyib:

“Necə qərar verəcəklər, elə də olacaq. Amma fikrimcə, məsələn, Kramarenko 1 həftəlik millinin düşərgəsinə yollansa, bu, problem olmayacaq. Həmin vaxt ÇSKA-nın futbolçuları da öz yığmalarında olacaqlar. Məncə, həlledilməz problem olmayacaq”.

Kramarenko SSKA ilə bu ilin mayınadək müqavilə imzalayıb.