Maksim Medvedev: “Reynaldonun yoxluğu bizim üçün problemdir”

“Qarabağ” klubunun müdafiəçisi Maksim Medvedev ölkə çempionatının 10-cu turunda “Ravan”la matçı dəyərləndirib. Allsport.az saytı xəbər verir ki, o, 1:0 qalib gəldikləri oyunda rəqibin şəninə tərif deyib:

“Avropa Liqasında “Monako”ya, Premyer Liqanın son turunda isə “Sumqayıt”a məğlub olduqdan sonra, “Rəvan”la matça çox ciddi hazırlaşmışdıq. Qələbə qazanmaq üçün əlimizdən gələni etdik. Üç xal qazansaq da, rəqib bizə ciddi müqavimət göstərdi.

Sözün açığı, “Rəvan”ın belə çıxış etməsi bizim üçün sürpriz oldu. Onların oyununu çox bəyəndim. Əksər futbolçuların gənclərdən təşkil olunmasına baxmayaraq, çox sərbəst oynayırdılar. Başqa komandalara nisbətən “Rəvan” “Qarabağ”dan çəkinmədi. Qol vura bilməsələr də, epizodları çox oldu. Bizə çətin anlar yaşatdılar. Reynaldonun yoxluğu bizim üçün problemdir.

O, “Qarabağ”ın hücum xəttində böyük bir fiqurdur. Reynaldo bütün futbolçularla meydanda yaxşı anlaşa bilir. Fərdi olaraq da çox güclüdür. Bir çox futbolçu onun qarşısında özünü itirir. Armentoros da güclü futbolçudur. Amma o hələ yenidir və potensialını tam göstərə bilmir. Vaxt lazımdır ki, rəqib müdafiəçilər ondan da çəkinsinlər”.