Rüsvayçılıq davam edir: millimiz evdə Macarıstana yenildi

Azərbaycan komandası yay təlim-məşq toplanışında ikinci yoxlama oyununu keçirib.

Allsport.az xəbər verir ki, Fernandu Santuşun rəhbərlik etdiyi kollektiv evdə Macarıstan yığması ilə üz-üzə gəlib.

“Liv Bona Dea Arena”da təşkil olunan görüş qonaqların 2:1 hesablı qələbəsi ilə yekunlaşıb.

Belaruslu referi Viktor Şimusikin idarə etdiyi matçda hesabı 5-ci dəqiqədə macarların hücumçusu Barnabaş Varqa açıb.

3 dəqiqə sonra Azərbaycan yığmasının futbolçusu Renat Dadaşov hesabı bərabərləşdirib.

Qarşılaşmada son nöqtəni 33-cü dəqiqədə “Liverpul”da çıxış edən Dominik Soboslai qoyub.

Bununla da, Azərbaycanın qələbəsizlik seriyası 10-a çatıb.

Azərbaycan yığması iyunun 7-də səfərdə Latviya seçməsi ilə qolsuz heç-heçəyə razılaşıb.