Nigar Arpadarai: Bu sərgidə Azərbaycan qran-prisinə daha böyük maraq müşahidə olundu

Formula1 yarışının Azərbaycanda təşkilatçısı Bakı Şəhər Halqası əməliyyat şirkəti İngiltərənin Birmingem şəhərində yerləşən “NEC arena”da sayca 28-ci beynəlxalq avtoidman sərgisində lövhə açıb. Allsport.az saytı xəbər verir ki, tədbirdə ziyarətçilərə çəkilişdə iştirak edərək Azərbaycana ikinəfərlik səyahət paketi və yarış bileti qazanmaq və simulyatorlarda Bakı Şəhər Halqasında yarışmaq imkanı təqdim olunub.

Həmçinin qonaqlara Formula1-in ən yeni şəhər treki olan Bakı Şəhər Halqası və satışda olan müxtəlif bilet seçimləri haqqında ətraflı məlumat verilib. Sərgidə Azərbaycan qran-prisini təmsil edən BŞH-nin Marketinq və Kommunikasiya şöbəsinin rəhbəri Nigar Arpadarai ölkəmizdə keçiriləcək Formula1 yarışına beynəlxalq ictimaiyyətin böyük maraq göstərdiyini bildirib:

“Biz Azərbaycan qran-prisini daha geniş auditoriyaya çatdırmaq üçün yarışı ən yüksək səviyyədə təbliğ etməyə çalışırıq. Bu möhtəşəm sərgidə ötən il də iştirak etmişdik, ancaq bu il Bakıda keçiriləcək yarışa daha böyük maraq müşahidə olundu. Stendimizi ziyarət edən avtoidman həvəskarları böyük həvəslə növbəti yarışı gözlədiklərini bildirdilər.

Həmçinin avtoidman sahəsi üzrə ixtisaslaşmış beynəlxalq media qurumlarının təmsilçiləri ilə də görüşlər keçirdik, onlara ilin ən yaxşı yarışına evsahibliyi etmiş paytaxtımızda baş tutacaq növbəti möhtəşəm Formula1 yarışı ilə əlaqədar son yenilikləri təqdim etdik. Göstərilən beynəlxalq marağa əsasən deyə bilərəm ki, bu il Azərbaycan qran-prisi xaricdən əvvəlki illərdəkindən daha çox avtoidman həvəskarı cəlb edəcək”.

Qeyd edək ki, beynəlxalq avtoidman sərgisi hər il Formula1 yarış mövsümü öncəsi qapalı məkanda keçirilən dünyanın ən böyük avtoidman sərgisidir. Sərgi çərçivəsində ziyarətçilərə Formula1 bolidləri və digər sürət yarışlarında yer alan avtomobillərlə yanaşı avtoidman və avtomobil sahələrinə dair son yeniliklərlə əyani şəkildə tanışlıq imkanı təqdim olunub.