“Qəbələ” “Çernomorets”lə sınaq matçı keçirmək üçün Ukraynaya gedir

“Qəbələ”nin Topaz Premyer Liqasında yaranan fasilə dövründəki hazırlıq planı müəyyənləşib. Allsport.az xəbər verir ki, UEFA Avropa Liqasının pley-off mərhələsindən “Panatinaikos”la (Yunanıstan) avqustun 27-də keçirilən cavab oyunundan (2:2) sonra istirahətə buraxılan futbolçular sentyabrın 1-də bir araya gələcək.

“Qırmızı-qaralar” həmin gün təlim-məşq toplanışı üçün Ukraynaya yollanacaq. Komanda Odessa şəhərində 6 gün hazırlıq keçəcək. Sentyabrın 7-də Azərbaycana dönəcək Roman Qriqorçukun çalışdırdığı komandanın Ukrayna toplanışı çərçivəsində yoxlama oyunu keçirməsi planlaşdırılıb. Komanda sentyabrın 6-da “Çernomorets”lə qarşılaşacaq.

“Qəbələ” təlim-məşq toplanışına tam heyətlə yollanmayacaq. Belə ki, milli komandaların düşərgəsində olan futbolçular hazırlıqlarda iştirak edə bilməyəcək. Arif Daşdəmirov, Məhəmməd Mirzəbəyov, Rəşad Sadiqov və Elvin Camalov Azərbaycan, Ermin Zets Bosniya və Herseqovina, Sergey Zenyov Estoniya millisinin düşərgəsindədir.

Xatırladaq ki, “qırmızı-qaralar” yığmaların oyunları ilə əlaqədar yaranan fasilədən sonra ilk qarşılaşmasını sentyabrın 13-də keçirəcək. “Qəbələ” Topaz Premyer Liqasının 4-cü turunda səfərdə “İnter”lə görüşəcək.