“Qəbələ” rəqibini yaxından tanıyaq

Avropa liqasının 3-cü ələməsində “Qəbələ” ilə qarşılaşacaq “Panatinaikos” yarışa birbaşa bu raunddan qoşulacaq. Allsport.az saytı xəbər verir ki, Afina təmsilçisi 2016/2017 mövsümündə Yunanıstan superliqasında 3-cü yeri tutub. 30 qarşılaşmada 57 xal toplayan paytaxt təmsilçisi çempion “Olimpiakos”dan 10, 2-ci olan PAOK-dan 4 xal geri qalıb. Afinalılar kubokda mübarizəni yarımfinalda dayandırıb. “Panatinaikos” PAOK-la dueldən məğlub ayrılıb – 2:0, 0:4. Məhz çempionatdakı bürünc medallar komandaya Avropa liqasındaə iştirak hüququ verib. Amma yeni mövsümöncəsi Afina klubu ciddi itki ilə üzləşib. Ötən mövsüm 22 qolla superliqanın ən yaxşı bombardiri olmuş Markus Berq 4 ildir şərəfini qoruduğu “Panatinaikos”dan ayrılıb.

Ümumiyyətlə, paytaxt klubu zəngin tarixə malikdir. 1908-ci ildə yaranan komandanın artıq 109 yaşı var. “Panatinaikos” idman cəmiyyətinin nəzdində yaranan futbol klubu sonradan 23 bölməsi olan bu birlikdən ayrılıb. Yarandığı andan yaşıl rənglərə sadiq qalan afinalılar oyunlarını 16 min tamaşaçı tutan “Apostolos Nikolaidis” stadionunda keçirir. Amma “Panatinaikos” daha böyük maraq doğuran qarşılaşmalarda  rəqiblərini Afinadakı 69 min 618 tamaşaçı tutan Olimpiya stadionunda qəbul edir. “Panatinaikos” Pirey “Olimpiakos”u ilə əzəli rəqabətdədir. Yunanıstanın bu iki təmsilçisinin oyunları “Əbədi düşmənlərin derbisi” adlanır. Amma afinalılar titulların sayında rəqibindən geri qalır.

Təxminən 1 milyondan artıq azarkeşi olan “Panatinaikos” ölkənin ikinci populyar komandası sayılır. Paytaxt klubu ilk uğurunu 1909-cu ildə əldə edib. Ümumyunanıstan çempionatında qalib gələn Afina klubu bu yarışda 6 dəfə çempion olub. 1927/28 mövsümündən keçirilən superliqada 20 çempionluq, 23 gümüş, 19 bürünc medal qazanan “Panatinaikos” ümumilikdə 81 mövsümdə 62 dəfə mükafatçılar sırasına düşüb. 18 dəfə Yunanıstan kubokunu əldə edən afinalılar 8 dəfə “qızıl dubl”a imza atıb. 5 dəfə də superkuboka yiyələnən komanda son illər əzəli rəqibinin kölgəsində qalıb. Sonuncu dəfə 2009/10 mövsümündə qızıl medallara yiyələnən komanda son 7 ildə 4 dəfə gümüş, 2 dəfə bürünc əldə edib. Son illərdəki yeganə titul 2013/14 mövsümündəki ölkə kubokudur.

“Panatinaikos” Yunanıstanın beynəlxalq arenadakı ən yaxşı təmsilçisidir. Avrokuboklarda 1960-cı ildə debüt edən Afina komandası tarixinin ən böyük uğuruna Ferents Puşkaşın baş məşqçiliyi altında imza atıb. Çempionlar liqasının finalına yüksələn “Panatinaikos” Niderland “Ayaks”ı ilə görüşüb. 1971-ci ildə Londonun “Uembli” stadionunda baş tutan qarşılaşmada amsterdamlılar 2:0 hesabı ilə qalib gəlib. Lakin hollandiyalılar qitələrarası kubokda oynamaqdan imtina edib. Bu yarışda onları əvəz edən “Panatinaikos” Uruqvay “Nasional”ına təkrar oyunda uduzub – 1:1, 1:2. “Yaşıllar”ın növbəti uğurları ötən əsrin 80-ci illərində əldə edilib. 1985-ci ildə Çempionlar Liqasının yarımfinalında “Liverpul”a uduzan afinalılar 3 il sonra UEFA kubokunda 1/4 finaladək irəliləyib. 1996-cı ildə çempionlar liqasının yarımfinalında “Ayaks”a uduzan yunanlar daha 3 dəfə 1/4 final həyəcanı yaşayıb.

1992 və 2002-ci illərdə qitənin ən nüfuzlu turnirində, 2003-cü ildə isə UEFA kubokunda buna nail olub. Lakin son illərdə “Panatinaikos” Avropada ciddi nəticə qazana bilməyib. Ötən il Avropa liqasının qrupunda 1 xalla sonuncu yeri tutan afinalılar 2015/16 mövsümündə pley-offda dayanıb. Həmin il “Panatinaikos”un qrupa yolunu məhz “Qəbələ” bağlayıb. Bakıdakı qolsuz bərabərlikdən sonra “qırmızı-qaralar” Afinada Dodonun dublu ilə 2:2 hesablı bərabərliyə nail olub. Səfər qolları komandamızı tarixində ilk dəfə qrupa daşıyıb. 2 ildən sonra yenə eyni rəqiblə qarşılaşacaq “Qəbələ” Yunanıstanın daha bir klubu ilə də görüşüb. 2 il öncə qrupda PAOK-la hər iki görüş qolsuz bərabərliklə nəticələnib.

Ümumən,  “Panatinaikos” avrokuboklarda 285 oyun keçirib. Afinalılar bu oyunların 99-da qalib gəlib, 70-də heç-heçə edib, 116-da uduzub. 344 qol vuran afinalılar 385 top buraxıb. Marinos Ozinidisin çalışdırdığı paytaxt klubu UEFA reytinqində 148-ci yerdə qərarlaşıb.