“Qəbələ”yə keçərkən başqa yaxşı variantım yox idi”

“Qəbələ”nin sabiq müdafiəçisi, hazırda Ukraynanın “Zarya” klubunda çıxış edən Mixail Sivakov keçmiş komandasına keçidini yada salıb. Allsport.az xəbər verir ki, o, yerli mətbuata açıqlamasında bunları söyləyib:

“Mən hər dəfə komanda dəyişərkən yaranan vəziyyətə görə özümdə günah olmayıb. Məsələn, mən məmnuniyyətlə o vaxt “Çernomorets”də qalmağa və orada daha uzun müddət oynamağa razı idim. Yaxşı klubdur, əla şəhərdir. Məni hər şey qane edirdi. Sadəcə, klubun problemləri yarandığından, getmək məcburiyyətində qaldım. “Qəbələ” ilə 4 aylıq müqavilə imzaladım. Çünki hara getdiyimi, nə olacağını bilmirdim. Həm də o vaxt mənim başqa yaxşı variantım yox idi. Üstəlik, məni oraya “Çernomorets”də birgə çalışdığım və yaxşı tanıdığım baş məşqçi (Roman Qriqorçuku nəzərdə tutur – red.) çağırırdı. Lakin “Qəbələ” ilə müqaviləmin müddəti bitən kimi klubdan getdim”.