Qazaxıstanlı iş adamı Azərbaycan klublarından söz açıb

“Bir gün klubların dövlətdən dotasiya almaqdan imtina edəcəyi an gələcək. Postsovet ölkələrindən çoxu bu dəstəyi almır”. Allsport.az saytı xəbər verir ki, bunu Qazaxıstanın “Kayrat” klubunun sahibi Kayrat Boranbayev deyib. 53 yaşlı iş adamı Rusiya mətbuatına müsahibəsində keçmiş SSRİ ölkələrinin futbol sektorundakı fəaliyyətindən söz açıb. O, klubların artıq qazanc götürməli olduqlarını söyləyib:

“Bəlkə səhv edirəm, amma mənə elə gəlir ki, postsovet məkanında yalnız üç çempionatda dövlətin və ya ona yaxın şirkətlərin dəstəyi olur. Bunlar Qazaxıstan, Azərbaycan və Rusiyadı. Bunlar fərqli təbii sərvətlərə sahib ölkələrdi. Buna görə də, görünür, dövlət futbol üçün müəyyən vəsait ayırmağa davam edir.

Ancaq vaxt gələcək futbol əsl biznesə çevriləcək. Klublar qazanmalıdılar. Bunu necə etmək, necə qazanc götürmək olar? Bir neçə dəfə analiz etmişik. Ticarətin köməyi ilə, futbolkalar satmaqla qazana biləcəyinizi söyləyirlər. Amma bunlar minusdu”.