“Qol epizodunda Filipin göz işarəsini gördüm və dərhal ötürmə verdim”

“Qəbələ” Avropa liqasının 2-ci ələməsinin cavab oyunları çərçivəsində “Yagelloniya” ilə səfər matçında 2:0 hesabı ilə qələbə qazanıb. Allsport.az saytı xəbər verir ki, 2-ci qolda Filip Ozobiçə gözəl ötürmə verən komandamızın kapitanı Cavid Hüseynov matç haqda fikrini gabalafc.az saytına açıqlayıb:

“Hesab 2:0 olsa da, çox ağır oyun oldu. Belə çətin olacağını gözləyirdik. Bilirdik ki, evdə güclü oynayan rəqib sürətli futbol göstərir. Azarkeşləri də bir dəqiqə dayanmadan matç boyu komandalarına dəstək verdi. Bizim üçün isə əsas nəticə idi. Oyunumuz o qədər ürəkaçan alınmasa da, qələbə qazandıq. Sevinirik ki, nəticə qazanıb, mərhələ keçdik. İkinci qoldakı assistentliyimə gəlincə, mən ötürmələr verməyi xoşlayıram. Çalışıram ki, belə imkanları qaçırmayım. Həmin epizodda Filipin göz işarəsini gördüm və dərhal ötürmə verdim.

O da imkanı qaçırmayaraq qol vurdu. Növbəti rəqib “Panatinaikos”la əvvəl də qarşılaşmışıq. Amma mən həmin matçlarda olmamışam. Bizim üçün əsas bu mərhələ idi ki, onu da arxada qoyduq. İndi növbəti rəqibi təhlil edib, güclü və zəif tərəflərin öyrənəcəyik. Artıq hər bir komanda ilə oynamağa hazırıq və matçdan-matça artıracağıq. “Yagelloniya”dan tam hazır olmadığımız üçün bir az geri qalırdıq. Hazır olduğumuz vaxtda bu komanda ilə asanlıqla oynayardıq. Düşünürəm ki, növbəti matçlara da hazır olacağıq”.