Qurban Qurbanov: “Şəmkir”lə görüşün bizim üçün faydası çox oldu”

“Qarabağ”ın baş məşqçisi Qurban Qurbanov Azərbaycan Kubokunun 1/8 final mərhələsi çərçivəsində 1-ci divizion klubu “Şəmkir”ə qarşı keçirdikləri oyunu şərh edib. Allsport.az xəbər verir ki, o, komandasının 2:0 hesablı qələbəsi ilə bağlı bunları söyləyib:

“Şəmkir”lə görüşdən sonra düşündüm ki, biz 1-ci diviziona daha çox diqqət ayırmalıyıq. Açığı, rəqibin oyununa baxmışdıq, onları təhlil etmişik. Amma istənilən halda futbolçuları belə bir oyuna kökləmək çətindir. Hesab edirəm ki, “Şəmkir” bizə çox çətinlik yaratdı. Bütün bunlara baxmayaraq, qələbə qazandıq, bu münasibətlə futbolçuları və azarkeşləri təbrik edirəm. Sıx qrafikimiz var, həm çempionat, həm də avrokubok matçına hazırlaşmalıyıq. “Şəmkir”lə görüşün bizim üçün faydası çox oldu”.