Rəşad Sadıqov: “Ən azı, 6-7 həftə yaşıl meydanlardan kənarda qalacağam”

“Fiorentina” ilə oyundan sonra öncə zədələnmişdim. Sadəcə, elə görüşlər idi ki, mütləq iştirak etməli idim”. Allsport.az saytı xəbər verir ki, bunu Azərbaycan milli komandasının kapitanı Rəşad Sadıqov jurnalistlərə açıqlamasında söyləyib. Onun sözünə görə, həkimlərlə oynayıb-oynamamağını məsləhətləşəndə, risk olduğunu bildirirdilər:

“Həmin oyunları kənardan izləyə bilmirdim. Həm Norveç, həm də PAOK-la matçlara zədəli çıxdım. Təhlükə gözlənilən idi. Bakıdakı son məşqdə zədəmi təzələdim. Bacarıqlı bir alman həkim var. Qismətdən o da Londonda idi. Əlaqə saxladıq və müayinədən keçdim. Bazar ertəsindən müalicəyə başlayacağıq. Ehtimala əsasən, ən azı, 6-7 həftə yaşıl meydanlardan kənarda qalacağam”.

Bu günkü oyunla bağlı isə Rəşad Sadıqov bildirib: «Oyuna çıxmamağım mənə çox çətin olacaq. Məşqi kənardan izlədim. Az qalırdı ki, «ürəyim partlasın». Amma futbol həyatında belə hallar olur. Başıma belə iş gəldiyi üçün peşman deyiləm. Müalicəmlə məşğul olub tam sağaldıqdan sonra, digər qarşılaşmalarda komandama kömək etməyə çalışacam».

Rəşad Sadıqovun fikrincə görə, Robert Prosineçki həmişə ədalətli heyət qurub: «O, həmişə formada olanlara şans verib. Məşq proseslərini də, futbolçuların klublarındakı oyunlarını da izləyib. Fikrimcə, Şimali İrlandiya üçün açıqlanan heyət ən ideal “11-lik”dir. Heyətdə futbolçular var ki, hamısı oynamağa layiqdir. Sadəcə, baş məşqçimizin öz taktiki gedişləri var. Mənə elə gəlir ki, bu heyətlə bugünkü oyunda uğur qazanacağıq».