Rekordçudan ilk dubl

Azərbaycan kubokunun 1/4 finalın “Səbail” ilə cavab oyunu (3:2) “Zirə”nin futbolçusu Adil Nağıyev üçün əlamətdar olub. Allsport.az saytı xəbər verir ki, klub tarixində ən çox oyun keçirən futbolçu adına yiyələnən 23 yaşlı müdafiəçi, sonradan meydana daxil olduğu qarşılaşmada 2 qola vurub. Bu, onun “Zirə”də ilk dubludur. 

Ümumilikdə, “qartallar”ın tarixində 19-cu dəfə bir oyunçu matçda 2 qol vurub. Azərbaycan kubokunda isə Nağıyevə qədər iki dubl qeydə alınmışdı. Nelson Bonilla 2015/16 mövsümündə AzAL, Vüsal İsgəndərli isə 2017/18 mövsümündə “Xəzər”in qapısından 2 top keçirib.

Adil “Zirə”nin tarixinə meydana sonradan daxil olub 2 qol vuran 5-ci futbolçudu. Ona qədər Sərxan Ağayev Birinci Divizionda, Luiz Alberto Diez, Vüsal İsgəndərli və Mirsahib Abbasov Premyer Liqada bunu bacarmışdısa, müdafiəçi kubok matçında ilk belə oyunçu olub.

Nağıyev “Zirə”nin tarixində ən çox qol vuran futbolçular siyahısında 5-ci olan Vüsal İsgəndərliyə çatıb. Hərəyə 8 qol vuran bu cütlük Nelson Bonilya (17), Riçard Qadze (12), Aslan Hüseynov (10) və Milan Duriçdən (9) geri qalır.

Qeyd edək ki, “Səbail”lə matç Adilin “Zirə”də 103-cü oyunu olub.