Riçard Almeyda 100-cü oyununu keçirdi

Topaz Premyer Liqasının 14-cü turunun “Neftçi” ilə matçında sonradan meydana çıxan “Qarabağ”ın üzvü Riçard Almeyda Azərbaycan çempionatlarında 100-cü oyununu keçirib. Allsport.az xəbər verir ki, 2012-ci ilin yayında transfer olunan yarımmüdafiəçi 2012/13 mövsümündə 30, növbəti çempionatda 28 qarşılaşmaya çıxıb.

Ötən mövsümdə də 30 matçın iştirakçısı olan yubilyar cari birincilikdəki 12-ci oyunda 100-ə çatıb. Almeyda Azərbaycan çempionatlarının 23 illik tarixində 100 və daha artıq oyun keçirən 8-ci braziliyalıdır.

“Sambaçılar” arasında mütləq rekord əvvəllər “Xəzər Lənkəran” və “Neftçi”də çıxış edib, hazırda “İnter”də oynayan Denis Silvaya məxsusdur. Müdafiəçinin hesabında 160 matç var. Fabio Luis Ramim 149, Junivan Suares 139, Flavinyo 133, Leandro Qomeş 119, Dodo 112, Ernani Pereyra 101 matçda meydana çıxıb.