Runidən son 8 mövsümün rekordu

Allsport.az xəbər verir ki, “Turan Tovuz”un futbolçusu Runi Eva Azərbaycan premyer liqasında son 8 mövsümün rekorduna imza atıb. O, 2015-ci ildən sonra bir çempionatda ən çox qol vuran afrikalı legioner olub.

Kamerunlu hücumçu cari mövsümdə 12-ci dəfə fərqlənib. O, 29-cu turda “Şamaxı” ilə ev qarşılaşmasında rəqib qapısına yol tapıb.

Afrika təmsilçisinin daha çox qol vurması sonuncu dəfə 2014/15 mövsümündə yaşanıb. Həmin vaxt AZAL-da çıxış edən konqolu Freddi Mombonqo 13 dəfə rəqib qapısına yol tapıb.

Sonrakı 8 ilin rekordu isə İbrahima Vadjiyə məxsus idi. “Qarabağ”ın seneqallısı ötən çempionatda 11 dəfə fərqlənib.