“Səbail” ilk dəfə rəqib qoluna sevinib

Premyer liqanın 17-ci turunda 2 avtoqol qeydə alınıb. Allsport.az saytı xəbər verir ki, turun ilk günündə mövsümün 6-cı avtoqolu vurulub. Bu, “Səbail” – “Qəbələ” matçına (2:1) təsadüf edib. Qonaqların ukraynalı müdafiəçisi Vitali Vernidub öz qapısına qol vurmaqla hesabı açıb. Hər iki komanda cari mövsümdə ilk dəfə avtoqola şahid olub.

Bu isə o deməkdir ki, “Səbail” tarixində ilk dəfə rəqib qoluna sevinib. “Qəbələ” isə çempionatın yüksək liqasında 4-cü dəfə öz qapısına qol vurub. Vernidubadək Murad Hüseynov 2011/12, Amit Quluzadə 2013/14, Ruslan Tağızadə 2014/15 mövsümündə uğursuzluq yaşamışdı.

Turun ikinci günündə isə Rail Məlikov uğursuzluq yaşayıb. Mövsümün 7-ci avtoqolu “Keşlə” – “Sumqayıt” görüşünə təsadüf edib. Qonaqların təcrübəli müdafiəçisi komandasının 2:1 hesabı ilə qalib gəldiyi matçda öz qapısına qol vurub.

Xatırladaq ki, mövsümün əvvəlki 5 avtoqolundan üçünə “Keşlə” (Murad Qayalı, Adrian Skarlatake, Denis Silva), birinə “Qarabağ” (Rahid Əmirquliyev), birinə isə “Zirə” (Jozef Bum) imza atıb. Bu qollardan üçü “Sumqayıt”, biri “Neftçi”, biri isə “Kəpəz”in xeyrinə olub.