Səlahət Ağayev “Acıbadəm Fulya”da əməliyyat olunmayacaq

“Neftçi”nin “Zirə” ilə oyun öncəsi məşqdə zədələnmiş qapıçısı Səlahət Ağayevin “sağ budun gətirici əzələsinin vətərinin hissəvi yırtığı” diaqnozu ilə əməliyyat olunacağı haqda məlumat vermişdik.

Allsport.az saytı xəbər verir ki, təcrübəli futbolçu “Neftçi”nin artıq 2 ildən çoxdu əməkdaşlıq etdiyi Avropanın öncül klinikalarından olan “Acıbadəm Fulya”da əməliyyat olunmaq üçün sentyabrın 19-da Türkiyənin İstanbul şəhərinə yola düşmüşdü.

Lakin orada müayinə olunandan sonra bu sahədə Türkiyənin tanınmış mütəxəssisi Bərkin Tokərin rəhbərlik etdiyi həkimlərin birgə rəyinə görə əməliyyata ehtiyac görülməyib. Səlahət Ağayevin həkimlərin nəzarəti altında daha əlverişli şəraitdə bərpa xarakterli fiziki məşqlər keçməsi üçün “Acıbadəm Fulya” xəstəxanasında qalması məqsədəuyğun sayılıb.

“Neftçi” rəhbərliyi bir neçə gündən sonra İstanbula yollanaraq Səlahət Ağayevə baş çəkməyi planlaşdırır. Həkimlərin qərarına görə, oktyabrın 10-dək Bakıya qayıdıb bərpa prosesini burada davam etdirəcək futbolçunun noyabrda komanda ilə məşqlərə başlaması gözlənilir.