Şahin Diniyev üçün tarixi oyun

Premyer liqanın 17-ci turunun “Sumqayıt”la oyunu (1:3) “Kəpəz”in baş məşqçisi Şahin Diniyev üçün əlamətdar olub. Allsport.az saytı xəbər verir ki, o, Gəncə klubunu 100-cü dəfə çempionat oyununa çıxarıb. 2004-cü ilin yayında “Gəncə” adlanan klubun baş məşqçisi təyin olunan təcrübəli mütəxəssis 2005-ci ilin sonunadək, yəni mövsümyarım komandaya rəhbərlik edib.

Azərbaycan milli komandasının “sükanı arxasına” keçməsi ilə əlaqədar klubundan ayrılan çalışdırıcı 2015-ci ilin yayında “Kəpəz”ə qayıdıb. 4 müxtəlif mövsümdə qərblilərə rəhbərlik edən 51 yaşlı mütəxəssis bu müddətdə 35 qələbə sevinci yaşayıb. 32 heç-heçə və 33 məğlubiyyətə şahid olan Diniyevin komandası 119 qol vurub və 106-nı buraxıb. “Kəpəz” onun rəhbərliyi altında ümumilikdə 137 xal qazanıb.