“Sumqayıt” İlham Yadullayevi baş məşqçi postundan uzaqlaşdırdı

“Sumqayıt” Futbol Klubu əvəzedici komandanın baş məşqçisi İlham Yadullayevlə yollarını ayırmaq qərarına gəlib. Allsport.az xəbər verir ki, B komandanın yeni baş məşqçisi məsələsinə isə yaxın vaxtlarda aydınlıq gələcək. “Sumqayıt” İlham Yadullayevə gələcək karyerasında uğurlar arzulayıb.

Qeyd edək ki, Samir Abasovun dövründə yaxşı çıxış edən “Sumqayıt”ın əvəzediciləri onun əsas komandaya təyinatından sonra Yadullayevə tapşırılmışdı. Amma gənc mütəxəssisin dövründə komanda yalnız ilk oyununda “İnter”ə 3:1 hesabıyla qalib gəlsə də, “Qarabağ” (0:0), “Neftçi” (1:1), “Zirə” (0:0) və AzAL-la (1:1) heç-heçə edib, “Xəzər Lənkəran” (3:5) və “Qəbələ”yə (1:3) isə uduzub.

Görünür, altı oyundur qələbə qazana bilməməsi klub rəhbərliyini narazı saldığı üçün, onunla yolların ayrılması qərara alınıb. Çünki “Sumqayıt” Samir Abasovun dövründə liderlər qrupunda qərarlaşsa da, son uğursuzluqlar nəticəsində komanda hazırda 4-cü pilləyə yuvarlanıb və 30 xala malik lider “Qəbələ”dən 7 xal geri qalır.