Tərlan Əhmədov: “Qəbələ” ilə oyunda qazanacağımız 3 xal mənə ən böyük hədiyyə olardı

Bu gün 46 yaşını qeyd edən “Neftçi”nin baş məşqçisi Tərlan Əhmədov sevinc təəssüratını bölüşüb. Allsport.az saytı xəbər verir ki, mütəxəssis klub əməkdaşına bunu söyləyib:

“Bir yaş da yaşa dolduq. Çoxları deyir ki, qocalırsan, amma biz yaşa doluruq, qocalmırıq. O ki qaldı ən böyük hədiyyəyə, ayın 19-da “Qəbələ” ilə oyunda qazanacağımız 3 xal mənim üçün ən böyük hədiyyə olardı. “Neftçi”də baş məşqçi olub doğum gününü qeyd etməyi yalnız xəyal edə bilərdim. Bu da bir qismətdir.

Hər halda, ilk dəfədi burada baş məşqçi kimi ad günümü qeyd edirəm. Baş məşqçi rolunda ad günü qeyd etmək daha şərəfli, daha məsuliyyətlidir. “Sumqayıt”la oyunda son illərin, bəlkə də son 5 ilin ən gözəl fanat dəstəyini gördüm. O dəstəyin, o istəyin sevinci müqabilində də komanda son dəqiqədə qol vurdu. Fanat olmasa, futbolçu heç vaxt aqressiv oynaya, oyunundan zövq ala bilməz.

Amma bizim son matçlarda qazandığımız 4 qalibiyyətin, demək olar, hamısında bizə sonadək dəstək olan fanatların böyük rolu var idi. Onlar hətta məğlub olduğumuz qarşılaşmalarda da bizə sona qədər dəstək olublar. Bu fanatların qarşısında çalışırıq bacardığımız qədər gözəl oyun nümayiş etdirərək qələbə qazanaq. Bu gün komanda bunun öhdəsindən gəlməyi bacarır, buna qadirdir. “Sumqayıt” üzərində qələbədə fanatlarımızın 100 faiz böyük rolu oldu”.