Topaz Premyer Liqasında 13-cü tur: kim tarixi üstünlüyə malikdir?

Bu həftə Topaz Premyer Liqasında 13-cü turun oyunlarına start veriləcək. Allsport.az xəbər verir ki, milli komandaların oyunları ilə əlaqədar yaranan qısa fasilədən sonra keçiriləcək tur “Xəzər Lənkəran” və “Neftçi” arasında “Böyük oyun”la əlamətdar olacaq.

Turun qarşılaşmaları 3 gün davam edəcək. Peşəkar Futbol Liqasının rəsmi internet saytı üz-üzə gələcək cütlərin Premyer Liqadakı oyunlarının balansını təqdim edir.

Topaz Premyer Liqası
13-cü tur
21 noyabr (şənbə)

61. “Qarabağ” – “Kəpəz” – 38 oyun, +16=8-14, top fərqi 47-51

“Qarabağ” 13 oyundur rəqibinə uduzmur. Gəncə təmsilçisi son 8 görüşdə cəmi 1 xal qazanıb. Ağdamlılar evdəki son 3 matçda qalib gəlib.

62. “Sumqayıt” – “Qəbələ” – 13 oyun, +1=1-11, top fərqi 8-28

“Qəbələ” son 3 qarşılaşmada qalib gəlib. “Qırmızı-qaralar” əvvəlki 13 matçın hamısında qol sevinci yaşayıb. 8 oyundur “Sumqayıt” qalib gələ bilmir.

22 noyabr (bazar)

64. “Rəvan” – “Zirə” – 1oyun, +0=0-1, top fərqi 1-2

65. “Xəzər Lənkəran” – “Neftçi” – 34 oyun, +7=15-12, top fərqi 28-39

“Xəzər Lənkəran” 9 oyundur qalib gələ bilmir. Paytaxt klubu son 8 qarşılaşmada meydanı qolsuz tərk etmir. “Neftçi” səfərdə 12 oyundur qələbə qazanmır. “Xəzər Lənkəran”ın son 4 ev qarşılaşmasında heç-heçə qeydə alınıb ki, bunların üçündə 2:2 hesabına təsadüf olunub.

23 noyabr (bazar ertəsi)

63. “İnter” – AZAL – 27 oyun, +10=12-5, top fərqi 25-20

AZAL son 8 oyunda qələbə qazana bilməyib. “İnter” ardıcıl 9 matçdır meydanı qolsuz tərk etmir. Sonuncular evdə keçirdiyi son 3 qarşılaşmada xal itirməyib.