Voleybol üzrə ölkə kubokunun qrup mərhələsi yekunlaşdı

Voleybol üzrə “Yaşıl dünya naminə həmrəylik ili” çərçivəsində təşkil olunan ölkə kubokunda kişilərin  mübarizəsində qrup mərhələsinin son qarşılaşmaları keçirilib. 

Allsport.az xəbər verir ki, GİN-nin voleybol mərkəzində təşkil olunan ilk qarşılaşma A qrupunda yer alan “Azərreyl” və “Neftçi” komandaları arasında olub. Oyuna daha yaxşı başlayan “Azərreyl” klubu üstünlüyünü sonadək qoruyaraq 3:0 hesabı ilə qələbə qazanıb.

Daha sonra meydana “B” qrupunda mübarizə aparan MOİK və “Murov Az terminal” komandaları çıxıblar. Qrup mərhələsinin son qarşılaşmasında da qalib 3 setdə müəyyən olunub. Bu görüşdə “Murov Az terminal” 3:0 hesablı qələbəni bayram edib.

Beləliklə, qrup mərhələsinin nəticələrinə görə, “A” qrupunda “Azərreyl” 6 xalla birinci, “Neftçi” 3 xalla ikinci olub. B qrupunda isə “Xilasedici” 6 xalla qrup lideri, “Murov Az terminal” isə 3 xalla ikinci olaraq yarımfinala yüksəliblər. 

Noyabrın 2-də baş tutacaq yarımfinal oyunlarında “Azərreyl” – “Murov Az terminal” ilə, “Xilasedici” isə “Neftçi” komandası ilə qarşılaşacaq.

Ölkə kuboku

Kişilər

31 oktyabr 

“A” qrupu

“Azərreyl” – “Neftçi” 3:0 (25:20, 25:20, 25:23)

“B” qrupu

MOİK – “Murov Az terminal” 0:3 (13:25, 16:25, 10:25)