Yaşar Vahabzadə: “Əvəzedici komandada oynamaqla inkişaf etmək çətindir”

Türkiyənin Antalya şəhərində Premyer Liqası klublarının təlim-məşq toplanışı və yoxlama oyunlarını izləyən Azərbaycan U-21 yığmasının baş məqşçisi Yaşar Vahabzadə AFFA-nın saytına açıqlama verib. Allsport.az sizi həmin açıqlama ilə tanış edir:

“Müvafiq oyunların hamısını izləməyə çalışırıq. Təkcə oyunlara yox, məşqlərə də baxırıq. Elə futbolçular var ki, potensiallarından aşağı çıxış edirlər. Bir qismi isə, əksinə, indi daha yaxşıdırlar. Axtarışlarımız davam edir. Fevralın 20-dən 26-dək Antalyada təlim-məşq toplanışında olacağıq. Həmin müddətdə 2 yoxlama oyunu keçirmək istəyirik. Bu istiqamətdə işlər gedir.

Komanda yeni olsa da, artıq 2 dəfə bir araya gəlib. Ötən ilin oktyabrında Almaniyada, noyabrda isə Maltada təlim-məşq toplanışında olduq. Maltada olarkən bu ölkənin U-21-i ilə yoxlama oyununda da gücümüzü sınadıq. U-21-ə mütəmadi dəvət edilən futbolçular yenə komanda ilə birgə olacaqlar. Belə demək mümkünsə, komandanın özəyi var.

Təəssüf ki, U-21-in əksər üzvləri klublarında əsas deyil, əvəzedici komandada çıxış edir. Halbuki onlar əsas komandaya düşməli, ustalıqlarını artırmalıdırlar. Əvəzedici komandada oynamaqla inkişaf etmək çətindir”.