Azərbaycan çempionatları tarixində 100-cü baş hakim

Premyer liqanın 26-cı turunda “Neftçi” – “Sumqayıt” oyunu debütlə əlamətdar olub. Allsport.az saytı xəbər verir ki, qonaqların 3:2 hesabıyla qalib gəldiyi matçı idarə edən Kamal Umudlu ilk oyununa çıxıb. O, Azərbaycan çempionatları tarixinə 100-cü baş hakim kimi düşüb. 

Gənc referi cari mövsümdə premyer liqada oyun idarə edən 14-cü hakimdi. Əvvəlki 25 turun 100 qarşılaşmasında 13 ədalət təmsilçisi baş hakim funksiyasını yerinə yetirib. Düzdü, onlardan biri – Rauf Allahverdiyev 17-ci turun “Keşlə” – “Sumqayıt” qarşılaşmasının (2:1) gedişində zədələnən baş hakim Rauf Cabbarovu əvəz etməklə debütünü gerçəkləşdirib.

Həm Allahverdiyev, həm də 12-ci turun “Zirə” – “Sumqayıt” matçında (3:1) debüt edən Səbuhi Bayramov karyerasındakı ilk premyer liqa oyununa cari mövsümdə çıxıb. Kamal Umudlu bu iki həmkarından sonra debütü cari mövsüm rəsmiləşən 3-cü baş hakimdir.

Müxtəlif səbəblərdən nəticəsi ləğv olunan oyunların nəzərə alınmadığı statistikaya əsasən 100 referidən ibarət cədvələ Xaqani Məmmədov başçılıq edir. O, Azərbaycan çempionatlarında 293 oyunu idarə edib. İlk “üçlük”də yer alan Fariz Yusifov 291, Rövşən Əhmədov isə 253 görüşdə baş hakim olub.