Azərbaycan və Almaniya polo klubları finalda görüşəcək

Bakıda arena polo üzrə dünya kubokunda “Rhein Polo Club Düsseldorf” (Almaniya) və “Indian Polo & Riding Club New Delhi” (Hindistan) komandaları qarşılaşıblar. Allsport.az saytı xəbər verir ki, görüşdə avropalılar 9:3 hesab ilə qalib gələrək finalına yüksəlib.

Günün 2-ci görüşü “Elite Horse & Polo Club” (Azərbaycan) və “Polo Club Wicklow” (İrlandiya) klubları arasında baş tutub. Gərgin mübarizədə bizimkilər 6:3 üstün olublar.

Dünya kubokunun sahibi Azərbaycan və Almaniya poloçuları sabah qalibi müəyyənləşdirəcəklər. İrlandiya və Hindistan klubları 3-cü yer uğrunda qarşılaşacaqlar.

Yarış Azərbaycan Xalq Cümhuriyyətinin 100-illik yubileyi münasibətilə Heydər Əliyev Fondunun dəstəyi və Atçılıq federasiyasının təşkilatçılığı ilə milli atçılıq festivalı çərçivəsində keçirilir.