Azərbaycan və Kolumbiya arasında ilk idman mübadiləsi

14 günlük idman mübadiləsində iştirak etmək üçün Azərbaycana yollanan 12 kolumbiyalı voleybolçu qız ölkələrinə geri dönüblər. Allsport.az saytı xəbər verir ki, Bakıda olan idmançılar Milli Voleybol Federasiyasının mənzil-qərargahında təlim keçməklə bərabər, Naxçıvan, Gəncə, Göygöl, Qax və Şəki şəhərlərini də ziyarət ediblər. Bölgələrə səfərləri zamanı voleybolçulara ölkədə idmanın inkişafı istiqamətində görülən işlər haqda məlumat verilib. Hər iki ölkənin idmançıları voleybolun yeni texnikalarını sınaqdan keçiriblər.

Bununla yanaşı, idmançılar Azərbaycan mətbəxi, tarixi, mədəniyyəti ilə yaxından tanış olmaq imkanı qazanıblar. Voleybolçular Gəncədə Nizami Gəncəvinin məqbərəsini və Şəki Xan Sarayı kimi tarixi yerləri ziyarət ediblər. Səfər San-Bernardodan olan gənclərin Tufandağa gəzintisi ilə başa çatıb.

Kolumbiyanın çoxtərəfli məsələlər üzrə nazir müavini Fransisko Xavyer Eçeverri voleybolçularla San Karlos Sarayında keçirdiyi görüşdə deyib: “Şübhəsiz ki, bu səfər Azərbaycanda tam cədvəl üzrə keçirilən ilk idman mübadiləsi, coğrafi mövqeyinə görə çox uzaq olan iki ölkənin yaxınlaşmasına imkan yaratdı, həmçinin təcrübə zamanı san-bernardolu gənc qızlar məsafə, dil və mədəniyyət baryerini aşaraq ölkələrimiz arasında sıx əlaqələr qurdular”.

Məlumat üçün bildirək ki, iki ölkə arasında ilk idman mübadiləsi Gənclər və İdman Nazirliyinin, Milli Voleybol Federasiyasının, Kolumbiyanın Bakıdakı diplomatik missiyası və Kolumbiyanın Xarici İşlər Nazirliyinin dəstəyi ilə Azərbaycanda keçirilib.