Azərbaycanın UEFA-nın klub reytinqində yenə gerilədi

UEFA Çempionlar Liqasının ikinci təsnifat mərhələsinin ötən gecə baş tutan ilk oyunları Azərbaycanın UEFA reytinqindəki mövqeyinə təsirsiz ötüşməyib. Allsport.az xəbər verir ki, ölkəmiz bu siyahıda bir pillə geriləyib.

Qeyd edək ki, Azərbaycanı qitənin ən nüfuzlu klub turnirində bu il də son çempion “Qarabağ” təmsil edir. Ağdam klubu ötən gecə doğma meydanda Çernoqoriya çempionu “Rudar”la qarşılaşdı və qolsuz heç-heçəyə razılaşdı – 0:0. Düzdür, ağdamlıların bu heç-heçəsi ölkəmizin xal ehtiyatını zənginləşdirdi. Belə ki, Qurban Qurbanovun çalışdırdığı komanda ölkəmizin reytinq hesabına 0,125 xal yazdırmış oldu.

Amma bu, Azərbaycanın bir pillə geriləməsinə mane olmadı. Çünki Serbiya çempionu “Partizan”ın Gürcüstan “Dila”sı üzərindəki qələbəsi bu ölkənin 28-ci pilləyə yüksəlməsinə şərait yaratdı. Hazırda UEFA reytinqində 54 ölkə arasında 28-ci pillədəyik. Azərbaycanın hesabında 11.375 reytinq xalı var ki, onun da 0.875 xalı cari mövsümdə qazanılıb (“İnter” – 0.250, “Neftçi” – 0.250, “Qəbələ” – 0.250, “Qarabağ” – 0.125). Reytinq cədvəlində Azərbaycanla Serbiya eyni xala malik olsa da, sözügedən ölkənin təmsilçiləri cari mövsümdə daha çox (1.000) xal qazandıqları üçün biz 29-cu pillədə qərarlaşmışıq.

Onu da əlavə edək ki, klublarımızın təsnifat mərhələsindəki istənilən qələbəsi Azərbaycana 0.250 reytinq xalı qazandırır. Heç-heçə isə sadəcə, 0.125 xal verir. Qrup mərhələsində heç-heçə 0.250, qələbə 0.500 xalla qiymətləndirilir.