Bu gün mərhum gənclər və idman naziri Azad Rəhimovun doğum günündən 60 il ötür

Bu gün mərhum gənclər və idman naziri Azad Rəhimovun doğum günüdür. Allsport.az saytı xəbər verir ki, onun dünyaya gəlməsindən 60 il ötür. Görkəmli ictimai-siyasi xadim 1954–1958-ci illərdə Azərbaycan SSR nazirlər sovetini sədri olmuş Sadıq Rəhimovun nəvəsidir.

Azərbaycan prezidenti İlham Əliyevin 7 fevral 2006-cı il tarixli 1275 nömrəli sərəncamı ilə o gənclər və idman naziri təyin edilib. Azad Rəhimov bu müddət ərzində 2012-ci ildə “Avrovizia” mahnı müsabiqəsinin, 2015-ci ildə Avropa oyunlarının, 2016-cı ildə Ümümdünya şahmat olimpiadasının, 2017-ci ildə İslam həmrəyliyi oyunlarının, voleybol üzrə qadınları Avropa çempionatının, 2019-cu ildə UEFA Avropa liqası finalının, Avropa gənclərinin olimpiya festivalının, 2020-ci ildə isə UEFA qitə çempionatının Azərbaycanda baş tutması üzrə yaradılan komitələrin rəhbərlərindən olub.

Onun dönəmində olimpiya millimiz London-2012-də 2 qızıl, 2 gümüş və 5 bürünc medal qazanıb. Bu, indiyədək ən yüksək əyarlı nəticə sayılır. Ölkə başçısının 29 iyun 2015-ci il tarixli 1298 nömrəli sərəncamı ilə idman sahəsində xidmətlərinə görə “Şöhrət” ordeni ilə, 24 iyul 2019-cu il tarixli 1344 nömrəli sərəncamı ilə gənclərlə iş sahəsində xidmətlərinə görə 1-ci dərəcəli “Vətənə xidmətə görə” ordeni ilə təltif edilib.

Azad Rəhimov 2021-ci ilin yanvarından ağciyər xərçəngindən və qaraciyər serozundan müalicə alıb. O, 30 apreldə Bakı vaxtı ilə saat 22:45-də ABŞ-nin Nyu-York şəhərində xəstəxanaların birində dünyasını dəyişib. 2 may 2021-ci ildə 2-ci Fəxri xiyabanda dəfn olunub.