Cavid İmamverdiyev: “Elazığspor”dan ayrılmaq istəmirəm”

Türkiyənin “Elazığspor” klubunun azərbaycanlı yarımmüdafiəçisi Cavid İmamverdiyev bir müddət əvvəl komandadan ayrılmaq istəməsinin səbəblərini izah edib. Allsport.az xəbər verir ki, millimizin üzvü Türkiyə mətbuatına açıqlamasında atasının səhətində problem olduğu üçün müəyyən müddətə Azərbaycanda qalmalı olduğunu bildirib:

”Elazığspor”u və onun azarkeşlərini çox sevirəm. Ancaq çətin günlərində atamın yanında olmalıydım. Baş məşqçimiz Ümid Özatla görüşdüm və ona bildirdim ki, ailəm Elazığda qala bilmir. Çünki heç vaxt vətəndən qıraqda yaşamayıblar. Üstəlik, atam xəstə olduğu üçün Bakıya qayıtmalı idik. “Elazığspor”da ayrılmaq istəmirəm. Problemləri yoluna qoyub komandamda qalacağam. Klub prezidentimiz Səlcuk Öztürkün qərarını gözləyirəm. O, necə isətəsə, elə də olacaq”.

İmamverdiyevin Elazığa gəldiyini və komanda ilə məşqlərə başladığını deyən klubun idman direktoru Mehmet Kaplan isə futbolçunu komandada saxlamaq istədiklərini bildirib: “Əlimizdən gələni edirik ki, Cavidin ailəsini Türkiyəyə gəlmələri üçün razı salaq. Onun kimi istedadlı futbolçunun komandamızda olmağından məmnunuq”.

Qeyd edək ki, İmamverdiyev “Elazığspor”da icarə əsasında çıxış edir. O, müqavilə ilə “Neftçi”yə məxsusdur.