“Çempionat başlayandan bunu gözləyirdik”

Premyer liqanın 9-cu turunda “Qarabağ” rəqib meydanında “Neftçi”ni 6 cavabsız qolla darmadağın edib. Allsport.az saytı xəbər verir ki, mətbuat konfransında qonaqların baş məşqçisi Qurban Qurbanov böyük hesablı qələbəyə belə şərh verib:

“Başda cənab prezidentimiz olmaqla, hamını təbrik edirəm. Neçə gün idi sevindirici xəbərlər var idi, bu gün tam əminliklə Şuşanın alındığını deyə bilirik. Bütün torpaqlarımız doğmadı, amma həqiqətən də, hamımızın qəlbində Şuşanın yeri başqadı.

Buna görə çox sevinirəm. Oyundan çox danışmağa ehtiyac yoxdur. Bəzən futbolda belə olur: bir komandada hər şey alınır, digərində yox. Bizim də başımıza belə hallar gəlib. “Neftçi”yə uğurlar arzulayıram. Futbolçularımı isə təbrik edirəm.

Futbolçular bu oyun bitdikdən sonra istirahət etməyi çox istəyirdi. Bəzi futbolçularımız milli komandaya gedəcək. Yığmaya uğurlar arzulayırm. Bu qələbə ilə 1-ci pilləyə yüksəldik. Çempionat başlayandan bunu gözləyirdik”.