Daun sindromlu uşaqlarla görüş

Bakı olimpiya stadionunda daun sindromlu şəxslərin reabilitasiya mərkəzindən, Nizami rayonunda yerləşən 1 saylı uşaq evindən və “Ümid Yeri” uşaq sığınacağından dəvət olunmuş 110 uşaqla görüş keçirilib.

Allsport.az xəbər verir ki, uşaqları arenada AFFA-nın baş katibinin müavini Sərxan Hacıyev və müxtəlif yığmalarımızın üzvləri qarşılayıblar.

Hacıyev qarşıdan gələn 31 dekabr – dünya azərbaycanlılarının həmrəyliyi günü və yeni il münasibəti ilə bağlı təbrikini çatdırdıqdan sonra uşaqlar millilərimizin üzvləri ilə meydana çıxıb. Stadionun əsas meydanında topla oynadıqdan sonra onlar üçün təşkil olunmuş əyləncəli proqrama qatılan iştirakçılara AFFA-nın hədiyyələri təqdim edilib.