Paris-2024: Elə ilk görüşdə bitdi

Sərbəst güləşçimiz Turan Bayramov (74 kq) Paris oyunlarında mübarizəyə qoşulub. Allsport.az saytı xəbər verir ki, o, 1/8 finalda albaniyalı Çermen Vəliyev ilə qarşılaşıb.

İlk hissəyə fəal başlayan idmançımız fasiləyə 3:0 üstün yollanıb. Amma 2-ci yarıda hərəkətsiz olması və hesabı qorumağa çalışması ona baha başa gəlib.

Rəqib son 6 saniyədə hücum edərək hesabı bərabərləşdirib. Xalların keyfiyyəti eyni olsa da, son xal alan Vəliyev olduğundan, o, sevinən tərəf olub.

Hakimlərin video-təkrara baxması heç nəyi dəyişməyib və albaniyalıya əlavə 1 xal verilib – 4:3.

Çermen 1/4 finalda özbəkistanlı güləşçiyə yenildiyindən, Turan üçün Paris-2024 erkən bitib.