Elmar Baxşıyev: ““Neftçi” rəhbərliyi hakimləri təzyiqdə saxlayır”

Premyer liqanın 16-cı turunda “Neftçi”yə səfərdə 0:1 hesabı ilə uduzan “Qəbələ”nin baş məşqçisi Elmar Baxşıyev oyundan sonra mətbuat konfransında iştirak edib. Allsport.az xəbər verir ki, o, əvvəlcə matç barədə fikirlərini bildirib:

“Hakimlik haqda danışmaq istəyirəm. Bu, uzun mövzudur. 16 tura 11 metrlik cərimə zərbəsi vurmamışıq. İnanıram bundan sonra da vurmayacağıq. Hər oyun bizə qarşı antipatiya var. Mübarizə epizodunun dayandırılmasını biz də istəmirik.

Amma “Neftçi”nin xeyrinə olan qayda pozuntusu qeydə alınır, bizə qaşı yox. Heç kimi təzyiq altında saxlamaq istəmirik. Bəlkə də “Neftçi”nin rəhbərləri, məşqçiləri təzyiq edirlər. Amma biz bunu etməyəcəyik. Mən komandama inanıram. Bizim komandaya qeyri kömək lazım deyil. Hakimlər nə varsa, onu idarə etsinlər. Bizə onların köməyi lazım deyil. Hər matçda bizə qarşı hakim səhvləri olur.

Sonra deyirlər ki, hakimdir, səhv edə bilər. Əlbəttə, biz də, mən də, komanda da səhv edir. Amma bir var səhvi düzəldirlər. Ancaq görürük ki, ard-arda davam edir. Biz nəticə çıxardığımız kimi hakimlər də çıxarmalıdır. Biz təzyiq etməyəcəyik. Əgər bizim hakimləri təzyiq altında saxlamaq istədiyimizi fikirləşirlərsə, oyunumuza davam edəcəyik.

Hamıya göstərəcəyik ki, “Qəbələ” yaşayır, büdcəsi az olsa da, meydanda bütün komandalara sözünü deməyə qadirdir. Hakim mənə deyir ki, xətti tapdalamısan. Baxıram ki, cəmi 10 sm qabağa çıxmışam. Əgər buna fikir verirlərsə, futboldan danışmağa ehtiyac yoxdur.

Aqressiv olmağıma gəlincə, ilk dəqiqələrdən görünürdü ki, hakim qərarları bir tərəfə verir, o birinə yox. Futbol ədalətli oyundur. Hakimlər üzərinə nə düşürsə, onu etsinlər. Bizə kömək lazım deyil. 16 turda penalti vurmayan komandayıq. Əgər varsa versinlər, yoxdursa verməsinlər. Rəqibi təbrik edirəm. Komandam meydanda hər şey etdi”.