“İndidən sonra işğal haqda yox, bu zəfərdən danışacağam”

“Qarabağ”ın baş məşqçisi Qurban Qurbanov Ermənistanın təslimçi sülh imzalanması və yerdə qalan qoşunların torpaqlarımızdan çıxmasından danışıb. Allsport.az saytı xəbər verir ki, o, klubun mətbuat xidmətinə açıqlamasında deyib:

“Bütün fikrimiz ordudan gələn xəbərlərdə idi. Hər birimizin illərdir gözlədiyi xəbər dünən cənab ali baş komandamız tərəfindən verildi. Hər zaman komandama hansı şəhəri təmsil etdiyimizi, hansı adı daşıdıqlarının məsuliyyətini izah edirdim. İndidən sonra işğal haqda yox, bu zəfərdən danışacağam.

Şükürlər olsun ki, ordumuzun şücaəti nəticəsində artıq torpaqlarımız düşmən işğalından qurtuldu, inanıram ki, məcburi köçkünlərimiz tezlikdə öz evlərinə qayıdacaq. Həmin şəhərlərimizdə oynayacağımız günü səbrsizliklə gözləyirəm.

Allah şəhidlərimizə rəhmət etsin. Allah şəhid analarımıza səbr versin. Gözün aydın olsun, Azərbaycan”.