“Neftçi İdman Klubu” ilin yekun tədbirini keçirib: İctimai birliyin təmsilçiləri 933 medala sahib olub

“Neftçi İdman Klubu”nda ilin yekunlarına həsr olunmuş tədbir keçirilib. Allsport.az saytı xəbər verir ki, dövlət himninin səsləndirilməsi ilə başlanan toplantıda Azərbaycanın müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Sonra “Neftçi İdman Klubu” idarəetmə aparatının rəhbəri Sadıq Sadıqov çıxış edib və tədbir iştirakçılarını Dünya azərbaycanlılarının həmrəyliyi günü və təqvim ilin gəlişi münasibətilə təbrik edib. Ardınca klubun baş meneceri Elmar Babanlı çıxış edərək, qurumun il ərzindəki fəaliyyəti və qazandığı uğurlar haqda ümumi məlumat verib. Daha sonra klubun  idman qurğularının rəhbərləri, müxtəlif idman növləri üzrə baş məçqçilər və idarəetmə aparatının məsul şəxsləri çıxış ediblər.

Məlumat verilib ki, yola salmaqda olduğumuz il ərzində “Neftçi İdman Klubu”nu təmsilçiləri böyük əzmkarlıq nümayiş etdirərək, 933 medala sahib olublar ki, onlardan da 335-i qızıl, 262-si gümüş, 336-sı isə bürüncdür. Bu medallardan 46-sı (12 qızıl, 16 gümüş, 18 bürünc) dünya çempionatlarında, 93-ü (31 qızıl, 22 gümüş, 40 bürünc) Avropa çempionatlarında, 23-ü (14 qızıl, 6 gümüş, 3 bürünc) V İslam həmrəyliyi oyunlarında, 5-i (4 qızıl,1 gümüş) isə IV dünya köçəri oyunlarında qazanılıb.