“Sabah”da 2 yubiley birdən

Premyer liqanın 22-ci turunun “Qəbələ” – “Sabah” oyunu 2 yubileylə əlamətdar olub. Allsport.az saytı xəbər verir ki, 0:0 hesabı ilə başa çatan qarşılaşmada qonaqların futbolçuları çempionatda yubiley görüşünə çıxıblar.

İlk dəqiqələrdən meydanda olan Rəşad Eyubov 150-ci oyununu keçirib. Bu matçlarda 22 qol vuran yarımmüdafiəçi “Sabah”da 7 görüşdə 2 dəfə fərqlənib. Ölkə çempionatında 2011/12 mövsümündə debüt edən Rəşad “Simurq”da 77 (13 qol), “Qəbələ”də 25 (3 qol), “Sumqayıt”da 23 (3 qol), “Kəpəz”də 13 (1 qol), “Neftçi”də 5 dəfə meydana çıxıb. 

Oyuna sonradan daxil olan Məqsəd isə 100-cü qarşılaşmasını keçirib. Bu müddətdə 2 qol vuran müdafiəçi indiki klubunda 19 matçda 1 dəfə fərqlənib. Debütü 2013/14 mövsümünə təsadüf edən futbolçu “Neftçi”də 75, “Keşlə”də 6 (1 qol) görüşün iştirakçısı olub.