Voleybol millisi Polşaya yollanıb

16 yaşadək voleybolçu qızlardan ibarət komandamız Şərqi Avropa voleybol zonal assosiasiyası (EEVZA) çempionatında iştirak etmək üçün bu gün Polşanın Debica şəhərinə yola düşüb.

Allsport.az xəbər verir ki, Şahin Çatmanın rəhbərlik etdiyi komandamız Estoniya, Litva və Ukrayna kollektivləri ilə üz-üzə gələcək. Yığmamız ilk matçını noyabrın 20-də Estoniya komandasına qarşı keçirəcək.

20-23 noyabr tarixlərində baş tutacaq yarış “AVRO-2025”ə seçmə xarakteri daşıyır. Reqlamentə əsasən, çempion qitə birinciliyinin final mərhələsinə vəsiqə əldə edəcək.

U-16 millimizin heyəti:

Oyunçular: Nisə Əlizadə, Mələk Hacızadə, Aysel Nəbiyeva, Fatimə Əliyeva, Liel Vetkina, Kamilla Manaxova, Çinarə Yusubova, Aylin Əlizadə, Dilarə Ağayeva, Nuray Vahablı, Zeynəb Quluzadə, Mədinə Əlibəyova, Məryəm Qocayeva, Çinarə Rəhimova.

Baş məşqçi – Şahin Çatma, məşqçilər- Həmid Anvari, Pərvin Səfərli.