FOTO

Qəbələdə dünya kübokunun açılışı keçirildi

Sabah «Qəbələ» atıcılıq klubunda dünya kubokunun finalı start götürəcək. Allsport.az saytı xəbər verir ki, Azərbaycan Atıcılıq Federasiyasının təşkilatçılığı, Gənclər və İdman Nazirliyinin və Milli Olimpiya Komitəsinin dəstəyi ilə keçiriləcək yarışda 40 ölkədən 500-ə yaxın idmançı iştirak edəcək. Bu yarış 7 mərhələdən ibərətdir.

Bu gün Qəbələnin Heydər Əliyev adına Konqres Zalında turnirin açılışı keçirildi. «Qəbələ» İdman Klubunun prezidenti Tale Heydərov çıxışda yarış barədə ətraflı məlumat verdi:

– Qəbələdə dünya reytinqinin üst sıralarında qərarlaşmış güllə və stend atıcıları mübarizə aparacaq. Sözü gedən sınaq cari ildə Beynəlxalq Atıcılıq Federasiyasının təqvim planında Avropa və dünya çempionatından sonra, ən mühüm yarış hesab olunur. Bu səbəbdən, rəqabət gərginliyi ilə yadda qalacaq.
Azərbaycan dünyada idman ölkəsi kimi tanırır. Ölkəmizdə Olimpiya Hərəkatı geniş vüsət aldıb. Bütün bu uğurlar ulu öndər Heydər Əliyevin məqsədyünlü siyasəti və onun layiqli davamçısı, Azərbaycan Prezidenti cənab İlham Əliyevin sayəsindədir.
Dünya kubokunun həlledici mərhələsi gələn il də ölkəmizdə, Qəbələdə keçiriləcək. Artıq bu, Beynəlxalq Atıcılıq Federasiyasının daimi təqvim planına salınıb. Həmin yarışda 3000-dən çox atıcı iştirak edəcək. Qrap-pri turniri də 2015-ci ildə keçirələcək tədbirlər siyahısındadır.

Milli Olimpiya Komitəsinin vitse-prezidenti Çingiz Hüseynzadə, öz növbəsində, ölkəmizdə gedən inkişafdan danışdı. Dedi ki, Bakı-2015-in yüksək səviyyədə təşkili dünya idmanına parlaq nümünə olacaq:

– Gələn il paytaxtımızda ilk Avropa Oyunları keçiriləcək. Əziz atıcılar, sizin hamınızı o yarışda bir daha gözləyəcəyik. Noyabrın 20-də Bakıda Avropa Olimpiya Komitəsinin Baş Assambleyasının toplantısı təşkil olunacaq. Həmin tədbirdə bir çox məsələlər müzakirə olunacaq; gələcəkdə qitə yarışların keçirilməsi burada təsdiqini tapacaq. Atıcılıq idmanı olimpiya proqramında mühüm rəqabətlərdən sayılır. Burada çox medal dəstləri qazanılır.

Beynəlxalq Atıcılıq Federasiyasının baş katibi Frans Şrayber tədbir iştirakçılarını salamladı. O, dünya kubokunun uğurla keçiriləcəyini bildirdi: «Azərbaycanda idmanın inkişafı üçün böyük işlər görülür. Bu yarışa səviyyəli atıcıları dəvət etmişik. Bizi qarşıda maraqlı və gözəl rəqabət gözləyir».

Gənclər və mdman nazirinin müavini İsmayıl İsmayılov, beynəlxalq federasiyanın ölkəmizə etimad göstərdiyinə görə təşəkkür etdi. O, çıxışını ulu öndərin idman barəsində söylədiyi bir ifadə ilə davam etdi:

– «Yeniyetmə və gənclərimizi pis vərdişlərdən uzaqlaşdırmaq üçün, proflatik tədbir kimi onları idmana cəlb etməliyik». Bəli, biz düz yoldayıq. Artıq Azərbaycanın dünya idmanının mərkəzlərindən birinə çevrilməsi qəbul olunur. Gələn il Bakıda 1-ci Avropa Oyunları, 2016-cı ildə Şahmat Olimpiadası və 2017-ci ildə İslam Həmrəylik Oyunlarının keçirilməsi bunu bir daha sübut edir.

Nazir müavini çıxışını bitirdikdən sonra yarışı açıq elan etdi. Dövlət himninin ardından, tədbir bədii hissə ilə davam etdi.

Qeyd edək ki, dünya kuboku 6 gün davam edəcək. Ölkəmizi bu sınaqda Nurlanə Cəfərova və Emin Cəfərov (hər ikisi – dairəvi stend) , İradə Aşumova və Ruslan Lunev (güllə atıcılığı ) təmsil edəcəklər.
Turnir beynəlxalq təşkilatın rəsmi televiziya kanalı ISSF TV-də canlı yayımlanacaqdır.

Kamran HACI, Qəbələ
Foto: Tofiq BABAYEV