Almaniyada Azərbaycan klubu qeydiyyata alındı

Almaniya məhkəmə orqanı dünya azərbaycanlıları assambleyasının futbol klubu olan “AZE Nakhchivan”ı rəsmi qeydiyyatdan keçirib. Allsport.az xəbər verir ki, Aydın Karaca komandanın rəhbəridir. 

Klubda Serdar Demir icraçı direktor, qanalı Nana İzak rəhbər müavini, Erkan Çelik maliyyə məsələlərindən məsul şəxs funksiyasını yerinə yetirəcək. “Araz Naxçıvan”ın baş direktoru Ceyhun Məmmədov isə Azərbaycan üzrə əlaqələndirici seçilib.

Komandanın artıq 1 yaşıl , 4 mini meydançası, futbolçuların asudə vaxtlarını keçirmələri üçün hər cür imkanlarla təmin olunmuş geniş kafe-bar, 4 soyunma otağı fəaliyyətə başlayıb.

DAA-nın prezidenti Rəşad Quliyev əsas məqsədin peşəkar futbol klubu yaradaraq, Avropada Azərbaycanı layiqincə təmsil etmək olduğunu bildirib: “Klubun adının Naxçıvanla bağlı olmasının əsas səbəbi Azərbaycanın qədim diyarının Avropada tanıdılmasıdır. Bu bölgənin zəngin tarixi, mədəniyyəti, turizmi, iqtisadi imkanlarına avropalıların diqqətini cəlb etməkdir. Eyni zamanda, peşəkar futbol klubu yaradaraq Avropada Azərbaycanı layiqincə təmsil etməkdir”.

“AZE Nakhchivan SK” klubu 2017-ci il 12 sentyabr tarixində Almaniyanın Köln şəhərində təsis olunub.