Atıcılarımız turniri 5 medalla başa vurdular

21-24 noyabr tarixlərində Serbiyada keçirilən gənclər arasında güllə atıcılığı üzrə Smederevo qran-prisində Azərbaycan idmançıları yüksək nəticələr göstərərək mükafatlarla təltif olunublar.

Allsport.az xəbər verir ki, idmançımız Vladislav Kalmıkov oğlanlar arasında pnevmatik tapançadan 10 metr məsafəyə atəş yarışında 574 xal toplayaraq qızıl medal qazanıb. İmran Qarayev isə eyni növdə 568 xal toplayaraq bürünc medala layiq görülüb. Qızlar arasında keçirilən eyni növ yarışda Leyli Əliyeva 560 xal toplayaraq gümüş medal əldə edib.

Bundan əlavə, 10 metr pnevmatik tapançadan atəş yarışlarında oğlanlardan ibarət milli komandamız komanda yarışında qızıl medal, qızlardan ibarət komanda isə gümüş medal qazanaraq ölkəmizi uğurla təmsil ediblər.