AVF-də geniş iclas: yeni regional voleybol klubları yaradıldı!

Azərbaycan voleybol federasiyasının idarə heyətinin geniş iclası keçirilib. Allsport.az saytı xəbər verir ki, tədbirdə AVF-nin prezidenti Şahin Bağırov, vitse-prezident Bəhruz Quliyev, baş katib Faiq Orucov, İdarə heyətinin üzvləri, yüksək liqa komandalarının, regional voleybol klublarının rəhbərləri və federasiyanın digər əməkdaşları iştirak ediblər.

AVF prezidenti iclası açaraq, hər kəsi salamlayıb, müzakirəyə çıxarılacaq məsələləri diqqətə çatdırıb. Sonra baş katib, bölgələrdə voleybolun inkişafı, aşağı yaş qruplarının yaradılması, gənc qız və oğlanların sağlam həyat tərzinin təmin olunması məqsədilə 8 RVK yaradıldığını deyib. Bu gün yüzlərlə yeniyetmə paytaxtda və bölgələrdə voleybolla məşğul olur.

Onların gələcəkdə klublarda çıxış etməsi və milli komandalara cəlb olunmasının vacibliyini qeyd olunub. Ardınca klub və RVK rəhbərləri bu məsələ ilə bağlı rəsmi sənədləri imzalayıblar.

Beləliklə, “Sumqayıt RVK” (qız), “Şərqi Zəngəzur RVK” (qız) “Abşeron VK”nın, “Bakı RVK” (qız, oğlan), “Oğuz RVK” (qız, oğlan), “Sumqayıt RVK” (oğlan) “Azərreyl VK”nın, “Naxçıvan VF” (oğlan), “Şərqi Zəngəzur RVK” (oğlan), “Tovuz RVK” (qız, oğlan), “Hacıqabul RVK” (qız, oğlan) “Murov Az Terminal VK”nın, “Gəncə RVK“ (oğlan) “Neftçi VK”nın, “Naxçıvan VF” (qız) “Milli Aviasiya Akademiyası VK”nın, “Gəncə RVK” (qız) isə “Gəncə VK”nın nəzarətinə verilib.

Tədbirdə bu layihənin həm klub, həm də RVK-lar üçün böyük əhəmiyyət kəsb etdiyi, həmçinin Azərbaycan voleybolu üçün uğurlu olacağı qeyd olunub. Hər bir kluba və RVK-ya fəaliyyətlərində uğurlar arzu edilib.

Daha sonra çimərlik voleybolunun rəhbəri Elqar Bağırov çıxış edərək çimərlik voleybolu üzrə milli komandalarımızın təlim-məşq toplanışları, beynəlxalq yarışlarda çıxışları və komandalarımızın hazırkı reytinq xalları ilə bağlı ətraflı məlumat verib. Qeyd edib ki, çimərlik voleybolçularımız CEV reytinq cədvəlində 8-9 pillə irəliləyiblər.

Bununla belə yaxın gələcəkdə daha yüksək pillələrdə yer almağın qarşıya məqsəd qoyulduğunu bildirib. Həmçinin hazırda paytaxtımızda keçirilən çimərlik voleybolu üzrə ölkə çempionatı haqqında ətraflı məlumat verilib. Vurğulanıb ki, iyulun 19-da final oyunları və yarışın bağlanış mərasimi olacaq.