Avropa ağırlıqqaldırma akademiyası Azərbaycanda

Azərbaycan ağırlıqqaldırma idmanında tarixi ilkə imza atıldı.

Allsport.az xəbər verir ki, beynəlxalq ağırlıqqaldırma federasiyasının (İWF) Bəhreyndə keçirilmiş növbəti konqresində, Azərbaycanda Avropa ağırlıqqaldırma akademiyasının qurulmasına namizədlik təqdimatı böyük maraqla qarşılandı. Azərbaycan respublikasının gənclər və idman nazirinin müavini Mariana Vasileva, Azərbaycan ağırlıqqaldırma federasiyasının prezidenti Kamran Nəbizadə və vitse-prezidenti Firdovsi Umudovun da qatıldığı tədbirdə təqdimatı AAF-ın təmsilçisi Turab Teymurov etdi. Təqdimat zamanı konqres iştirakçılarına ölkəmizin tarixi, bu günü, turizm potensialı, geniş infrastruktur imkanları, beynəlxalq tədbirlərin təşkili üzrə böyük təcrübəsi, idman nailiyyətləri, həmçinin Azərbaycan prezidenti cənab İlham Əliyevin idmana dövlət səviyyəsində diqqət və qayğı göstərdiyi barədə məlumat verildi, xüsusi videoçarx nümayiş etdirildi.
Təqdimat iclas iştirakçılarının alqışları ilə qarşılandı, Avropa ağırlıqqaldırma akademiyasının məkanı statusunu qazanan ölkəmiz təbrik edildi.
Beynəlxalq ağırlıqqaldırma federasiyasının prezidenti Məhəmməd Calud və digər rəsmilər Azərbaycanda idmana göstərilən diqqəti xüsusi fərqləndirdi və akademiyanın fəaliyyətində uğurlar arzulandı.
Avropa ağırlıqqaldırma akademiyasında beynəlxalq məşqçilik kursları, lisenziyalaşdırma üzrə seminar və mühazirələr, həmçinin müvafiq hakimlik məşğələləri, idmançılar üçün dərslər, kateqoriya və ixtisas təlimləri keçiləcək. Akademiyadakı tədrisdə Avropa və ehtiyac olacağı təqdirdə yaxın region ölkələrinin nümayəndələrinin iştirakı təmin ediləcək. Akademiyanın Bakıdakı ASK arenada yerləşməsi nəzərdə tutulur.
Dünyada cəmi 5 belə ağırlıqqaldırma akademiyası qurulacaq. Azərbaycanla yanaşı bu hüquqa Asiyada Çin, Afrikada Misir, Amerikada Kuba, Okeaniyada isə Samoa sahib olub.
Bununla yanaşı, konqresdə beynəlxalq ağırlıqqaldırma federasiyasının ayrı-ayrı komitələrinin hesabatları dinlənildi, kommersiya tərəfdaşlarının təqdimatı baş tutdu. İWF-in konstitusiyasına təklif edilən dəyişikliklər ümumi səsvermə yolu ilə qəbul edildi.