Avstriyada Avropa olimpiya komitəsinin iclası və seminarı

Vyanada Avropa olimpiya komitəsinin icraiyyə komitəsinin iclası və seminarı olacaq. Allsport.az saytı xəbər verir ki, tədbirdə ölkəmizi MOK-un vitse-prezidenti Çingiz Hüseynzadə və marketinq idarəsinin direktoru Mehman Kərimov təmsil edəcəklər.

Mayın 17-də adı ilk çəkilən idman rəsmisi İK-in toplantısına qatılacaq. İclasda AOK-un prezidenti Janez Koçijançiçin, baş katib Rafael Paqnozzinin, Milli Olimpiya Komitələri Assosiasiyasının baş katibi Qunilla Lindberqin də iştirakı gözlənilir.

Mayın 18-19-da isə AOK-un 39-cu seminarı işə başlayacaq. Yığıncaq çərçivəsində olimpiya idman növləri, sosial inteqrasiya, qadın və idman, idmanda texnologiya və s. mövzular üzrə çıxışlar ediləcək.

Həmçinin 2020-ci il Tokio və 2024-cü il Paris olimpiya oyunlarının təşkilat komitələrinin hesabat çıxışları gündəlikdə olan məsələlər sırasındadır. Minsk-2019 Avropa oyunları, Bakı-2019 Avropa gənclər olimpiya festivalı ilə bağlı da məruzələr dinləniləcək.

AOK-un seminarı çərçivəsində qış idman növləri üzrə “Pyotr Nurovski – Avropanın ən yaxşı gənc idmançısı” mükafatı təqdim olunacaq.