Azad Rəhimov: “5 növdə medalların qazanılması onu göstərir ki, bizdə hər istiqamətə fikir verilir”

“Rio Yay Olimpiya Oyunlarından sonra statistik rəqəmlər, idmançılarımızın 18 medal qazanması Azərbaycanı xüsusi yerə qoyur.” Allsport.az saytının xəbərərinə görə, bunu gənclər və idman naziri “Rio-2016-ya  ezam olunmuş jurnalistlərə müsahibəsində deyib. Azad Rəhimov bildirib ki, Azərbaycan dünyada idmançıların faydalılığına görə birinci yerdədir:

“Bu, məşhur “Telegraf” agentliyinin yaydığı məlumatda da əks olunub. Həmin məlumatda ABŞ 3-cü yerdə göstərilib. Medal sayı baxımından 207 ölkə arasında 15-ci sıradayıq. Bu da inanılmaz dərəcədə yüksək nəticədir. Avropada 7-ci, İslam ölkələri arasında 1-ci, MDB-də 2-ci yerdəyik. Bunlar çox yüksək, gözlənilməz nəticələrdir. Medal keyfiyyəti baxımından isə 39-cu sıradayıq. Baxmayaraq ki, “London-2012″də 30-cu idik. Amma gümüş medalların sayı “qızıl”ları ikiqat əvəzləyir. Sevindirici hal odur ki, 2 deyil, 5 idman növündə medal qazanmışıq.”

Onun sözünə görə, bizi qızıl medal sayında qabaqlayanlar 2, maksimum 3 növdə medal qazanıblar: “Həmin ölkələr üstünlüyü bu növlərə veriblər, digər növlər diqqətdən kənarda qalıb. Amma bizim geniş tərkib, 5 növdə medalların qazanılması onu göstərir ki, bizdə hər istiqamətə fikir verilir, nəticə də bu üzdədir”.