Bakıda çempion olan, “Qarabağ”la görüşdə debüt edən futbolçu “yarasalar”la anlaşdı

İspaniya “Valensiya”sı yeni futbolçu ilə gücləndirib. Allsport.az saytı xəbər verir ki, la liqa klubu Lissabon “Sportinq”indən Tyerri Korreyanı transfer edib. 20 yaşlı portuqaliyalı müdafiəçi ilə 5-illik anlaşılıb. “Yarasalar” bu transferə görə 12 milyon avro ödəyiblər.

Yeniyetmə və gənclər yığmalarında oynamış Korreya “Sportinq”in öz yetirməsidir. O, ölkəsinin U-17 yığmasının heyətində Azərbaycanda keçirilmiş Avropa çempionatının qalibi olub. Tyerri həmin qitə birinciliyində 3 oyunda meydanda olub.

Maraqlıdır ki, onun ölkəmizdə daha bir bağı var. Onun “Sportinq”də peşəkar səviyyədə ilk rəsmi oyunu Avropa liqasının qrup mərhələsində “Qarabağ”a 6:1 hesabıyla qalib gəldikləri Bakıda qarşılaşma olub.