Boks və güləş yarışları da Rio-2016-ya vəsiqə verəcək

Gələn il paytaxtımızda keçiriləcək 1-ci Avropa Oyunlarının proqramına daxil olan boks və güləş yarışlarının Rio-2016-ya vəsiqə verəcəyi bu gün təsdiqlənib. Allsport.az saytı xəbər verir ki, ümümən, Bakı 2015-də 20 idman növündən 11-i Braziliyada təşkil olinacaq növbəti Olimpiya oyunlarına lisenziya verəcək.

Avropa Olimpiya Komitələrinin prezidenti Patrik Hikki bu barədə belə deyib: “Boks və güləşin Rio-2016-ya təsnifat hüququnun təsdiqlənməsi, Bakı-2015-in idman proqramının düzgün istiqamətdə inkişafının göstəricisidir. Bu, məni çox sevindirir. Avropa Olimpiya Komitələrinin Avropa Oyunlarına aid konsepsiyasının bir hissəsinə görə, idmançıların özlərini daha yüksək səviyyədə sınamaları üçün elit idman yarışları yaradılmalı idi və Bakı-2015 bunu etdi”.

Bakı 2015-in Əməliyyatlar üzrə baş direktoru Saymon Kleq deyib: “Olimpiya Oyunlarının kvalifikasiya prosesinin bir hissəsi kimi ilk Avropa Oyunlarında belə çox sayda beynəlxalq idman federasiyalarının iştirak etməsi faktı Azərbaycanda nə dərəcədə yüksək keyfiyyətli idman tədbirinin olacağının sübutudur. Avropa Olimpiya Komitələri və Prezident Patrik Hikki bizim ən güclü idmançılarımızın qarşıdakı illərin Olimpiya Oyunları üçün öz şanslarını doğrultmaları baxımından bu böyük, multi-idman yarışının bütün qitə üçün mühüm olacağına əmindirlər”.

Bakı-2015-in boks yarışında kişilər arasında 10 çəki dərəcəsinin hər birində medal qazanan idmançı Rio-2016-da iştirak etmək hüququ qazanacaq. Güləş növündə Rio-2016-ya düşmək üçün ələmənin bir hissəsi Bakı-2015-də olacaq.

Bakı-2015-in idman şöbəsinin direktoru Pirs O’Kallahan bildirib: “İlk Avropa Oyunlarının ən məşhur idman növlərindən ikisi boks və güləş olacaq. Odur ki, idmançıların çoxunun Rio-2016-ya doğru yollarına məhz buradan başlayacaqlarını bilmək çox xoşdur”.

Rio olimpiadasına vəsiqə verən 11 idman növünə oxatma, atletika, boks, velosiped idmanı, atıcılıq, üzgüçülük, stolüstü tennis, taekvondo, triatlon, güləş və voleybol daxildir.