Boyanka Kostova: İndi deyə bilmərəm, olimpiadaya düşəcəm, ya yox. Qarşıda yenə lisenziya yarışı var

Belarusun Qrodno şəhərində 2-qat olimpiya çempionu Aleksandr Kurloviçin xatirəsinə kubok yarışında Boyanka Kostova (59 kq) qızıl medal qazanıb. Allsport.az xəbər verir ki, Tokio oyunlarına yollanmağı qarşısına hədəf qoyan təcrübəli ağırlıqqaldıran bunu deyib:

“Təşkilatçılıq yaxşıdır. Çıxışımdan da razıyam. Çox səy göstərdim. Hazırlığımız da yüksək keçmişdi. İndi qaydalar dəyişib, artıq olimpiadaya birbaşa yollanmaq olmur.

Gərək, xallar yığasan. Hazırda deyə bilmərəm, ora düşəcəm ya yox. Amma qarşıda ələmələr var. Mübarizə aparıb xal ehtiyatımı daha artıracağam”.