“Böyük dəbilqə”də böyük uğur!

Özbəkistanın paytaxtı Daşkənddə keçirilən cüdo üzrə “Böyük dəbilqə” turniri başa çatıb. Allsport.az xəbər verir ki, son yarış günündə möhtəşəm çıxış edən milli komandamızın 4 üzvü fəxri kürsüyə qalxıb.

Murad Fətiyev (90 kq) və Kənan Nəsibov (+100 kq) bütün rəqiblərinə qalib gələrək çempion olublar. Adı ilk çəkilən təmsilçimiz finalda 2-qat olimpiya çempionu Laşa Bekaurini (Gürcüstan), digəri isə həlledici görüşdə olimpiya və dünya mükafatçısı Əlişir Yusifovu (Özbəkistan) məğlub edib.

Səlim Kotsoyev (100 kq) və Camal Həmzətxanov (+100 kq) isə bürünc medal qazanıblar.

Daha əvvəl Əhməd Yusifov (60 kq) və Ömər Rəcəbli (81 kq) qızıl, Balabəy Ağayev (60 kq) isə gümüş medala sahib çıxmışdı.

Yekunda 4 qızıl, 1 gümüş və 2 bürünc olmaqla 7 medal qazanan Azərbaycan 39 ölkə arasında ümumi komanda hesabında ikinci, kişilərin yarışında isə birinci yeri tutub.