BP və Bakı-2017 İslam Həmrəyliyi oyunları tərəfdaşlıq müqaviləsi bağlayıb

Bu gün BP ilə Bakı-2017 İslam Həmrəyliyi oyunları tərəfdaşlıq sazişi imzaladılar. Allsport.az saytı xəbər verir ki, anlaşma şirkətin Azərbaycanda idman potensialının inkişaf etdirilməsinə dəstək olmaq öhdəliyinin bir hissəsidir və Milli Olimpiya və Paralimpiya Komitələri ilə uzunmüddətli uğurlu tərəfdaşlığa söykənir. O, həmçinin Bakı-2015 Avropa oyunları və 2012-ci il London olimpiya və paralimpiya oyunları üzrə BP-nin təcrübəsi və sıx əməkdaşlığına əsaslanır.

Həmçinin Bakı-2017 İslam Həmrəyliyi oyunlarının rəsmi tərəfdaşı olmaqla BP şirkətioOyunlara və sonrakı yarışlara hazırlaşdığı müddətdə yeddi milli idman elçisinə dəstək olmağa davam edəcək. Bundan əlavə, BP şirkəti Bakı-2017 könüllülük proqramının həyata keçirilməsinə dəstək olacaq. Bu təşəbbüs çərçivəsində 6000 gənc yalnız oyunların keçirilməsində mühüm rol oynamaq imkanı qazanmayacaq, onlar həmçinin liderlik, təqdimat, ünsiyyət və ictimaiyyət qarşısında çıxış bacarıqlarını təkmilləşdirməyə yardım edən geniş təlim proqramından faydalanmaq imkanına malik olacaqlar.

Gənclər və idman naziri və İslam Həmrəyliyi oyunlarının əməliyyat komitəsinin icraçı direktoru Azad Rəhimov bununla başlı bunu dedi: “Öz iştirakını təsdiqləmiş 50-dən artıq ölkənin qatılacağı Bakı 2017 Oyunları bütün İslam ölkələrindən olan xalqları sülh, həmrəylik, hörmət və mükəmməllik ruhunda bir yerə toplayan mötəbər beynəlxalq idman tədbiri olmağı vəd edir.

Biz məmnunuq ki, BP Bakı-2017-yə tərəfdaşlıq etmək və bizə bu oyunların keçirilməsində fəal surətdə yardım etmək istəyir. BP ötən 25 il ərzində Azərbaycanda idman, mədəniyyət və təhsil sahəsindəki təşəbbüslərə sərmayə qoyan bir şirkət olaraq yüksək nüfuz qazanıb. Buna görə də, BP şirkəti yalnız könüllülərimizə oyunlar zamanı lazımi bacarıqlar vermək üçün deyil, həm də onların gələcək karyeralarını qurmalarına kömək etmək üçün nəzərdə tutulmuş Oyunların Könüllük Proqramının həyata keçirilməsində bizə yardım edən mükəmməl tərəfdaş olacaq”.

BP-nin Azərbaycan, Gürcüstan və Türkiyə üzrə regional prezidenti Qordon Birrell öz növbəsində bunu söylədi: “2017 bizim üçün əlamətdar bir ildir. Biz Azərbaycan hökuməti və xalqı ilə uğurlu tərəfdaşlığımızın 25 illiyini qeyd edirik. Biz bu gün məmnuniyyətlə elan edirik ki, 25 illiyimizin qeyd olunması çərçivəsində biz Bakı 2017 İslam Həmrəyliyi Oyunlarının rəsmi tərəfdaşı olacağıq və eləcə də Milli Olimpiya və Paralimpiya Komitələri ilə olan tərəfdaşlıq sazişimizin müddətini 2020-ci ilədək uzatmaqla onlara dəstəyimizi gücləndirəcəyik.

2017-ci il Azərbaycan üçün də möhtəşəm bir ildir, belə ki, onun paytaxtı Bakı şəhəri İslam Həmrəyliyi Oyunlarına ev sahibliyi edəcək. Ölkə üçün əlamətdar olan bu tədbirə qoşulmaqla biz bir daha vurğulamaq istəyirik ki, biz Azərbaycanla birlikdəyik və idman həyəcanını onunla birlikdə qeyd etmək istəyirik.

Ölkənin idman potensialının inkişafına dəstək göstərilməsi bizim sosial sərmayələrimizdə prioritet sahələrdən biridir. Azərbaycanın uzunmüddətli və etibarlı neft-qaz tərəfdaşı kimi ötən 25 il ərzində BP təhsil, yerli icmalar, yerli müəssisələr, mədəni irs, idman və bir sıra digər sahələrə sərmayələr qoymaqla ölkəyə dəstək olmaq öhdəliyinə sadiq qalıb. Biz bütün bunları ölkənin güclü gələcək qurmaq naminə potensialın yaradılması səylərinə qoyulan sərmayə kimi görürük”.